പോപ്പുലർ ഫ്രണ്ടിനോട് ചോദിക്കേണ്ട ചോദ്യങ്ങൾ?

പോപ്പുലർ ഫ്രണ്ടിന്റെ ചെയ്തികളെ ചുമ്മാതങ്ങ്‌ അപലപിച്ചത്‌ കൊണ്ട്‌ കാര്യമില്ല.അവരുടെ പ്രചരണങ്ങളിൽ നിരവധി ഇസ്ലാം മതവിശ്വാസികൾ വീണൂ പോകുന്നുണ്ട്‌.അവരുടെ പ്രവർത്തനത്തിലെ ന്യായാന്യായങ്ങൾ വിശദമായി ചർച്ച ചെയ്യപ്പെടേണ്ടതുണ്ട്‌.അതിനവർത്തന്നെ തയ്യാറാവണം.അവരുടെ ഭാഗത്ത്‌ ന്യായമുണ്ടെങ്കിൽ അവർ പറയട്ടെ.അവരെ അതിന്‌ നിർബന്ധിക്കുന്ന രീതിയിൽ ഒരിടപെടൽ മതസംഘടനകൾ നടത്തണം.
ചില ചോദ്യങ്ങൾ സന്ദേഹിയുടെ വകയായി ഇതാ.ഇതിനേക്കാൾ ഗംഭീരമായ ചോദ്യങ്ങൾ ഉണ്ടായിരിക്കാം.പോപ്പുലർ ഫ്രണ്ടിന്റെ ഓരോ പ്രവർത്തകനും ഇത്തരം ചോദ്യങ്ങൾ അഭിമുഖീകരിക്കണം.അവരുടെ മനസാക്ഷിയുടെ കോടതിയിൽ അവരത്‌ സ്വയം ചോദിക്കട്ട്‌.

ചോദ്യങ്ങൾ

ജോസഫ്‌ എന്ന അധ്യാപകന്റെ കൈ വെട്ടിയത്‌ പോപ്പുലർ ഫ്രണ്ട്‌ ആണോ? അല്ലെങ്കിൽ പിന്നെ ആരായിരിക്കും എന്നാണ്‌ നിങ്ങളുടെ അഭിപ്രായം?മറ്റു പല സംഭവങ്ങളും ചുഴിഞ്ഞന്വേഷിച്ച്‌ അഭിപ്രായം പറയുന്ന നിങ്ങൾക്ക്‌ ഇതിനെക്കുറിച്ച്‌ ഒരു സംശയവും ഊഹവും പറയാനില്ലേ?
സംഘപരിവാർ സംശയിക്കപ്പെടുന്ന ഒരു സംഭവമാണെങ്കിൽ നിങ്ങൾ മുൻ പിൻ നോക്കാതെ പ്രോപഗണ്ടയുമാമായി ഇറങ്ങിക്കഴിഞ്ഞിരിക്കില്ലേ?

പോപ്പുലർ ഫ്രണ്ടല്ല കുറ്റം ചെയ്തതെങ്കിൽ ഇത്‌ തെറ്റാണെന്ന് നിങ്ങൾക്കഭിപ്രായമുണ്ടോ? തെറ്റാണെന്നാണ്‌ അഭിപ്രായമെങ്കിൽ അതിനുള്ള കാരണങ്ങൾ പറയാമോ?മതപരമായി/ഇസ്ലാമികമായ കാഴ്ചപ്പാടിൽ ഈ ചെയ്തത്‌ തെറ്റാണെന്ന് പോപുലർ ഫ്രണ്ട്‌ പറയാൻ തയ്യാറാണോ?അങ്ങനെ പറഞ്ഞ മറ്റ്‌ മുസ്ലിം സംഘടനകളോട്‌ യോജിക്കുന്നുണ്ടോ?

പോപ്പുലർ ഫ്രണ്ടല്ല ഇത്‌ ചെയ്തതെന്നാണ്‌ വാദമെങ്കിൽ ഈ സംഭവത്തെ ശക്തമായി അപലപിച്ചുകൊണ്ട്‌ രംഗത്തിറങ്ങാനും സാമുദായിക സൗഹാർദ്ദം തകരാതിരിക്കാൻ ക്രിയാത്മകമായി മുന്നോട്ട്‌ വരാനും തയ്യാറുണ്ടോ?ഈ തെറ്റിന്റെ മതപരവും സാമൂഹികവുമായ മാനങ്ങളെ തുറന്നു കാട്ടി ഒരു കാമ്പൈൻ നടത്താൻ തയ്യാറുണ്ടോ? വിമാനത്തിൽ ബോംബ്‌ വെച്ച സംഭവത്തിൽ വരെ പോസ്റ്റർ കാമ്പൈൻ നടത്തിയ പോലെ ഈ തെറ്റിനെതിരെ അങ്ങനെ ഒന്നു നടത്തുമോ?

മറ്റ്‌ മുസ്ലിം സംഘടനകൾ സംഭവത്തെ അപലപിച്ച പോലെ നിങ്ങൾ അപലപിക്കാത്തത്‌ എന്തുകൊണ്ടാണ്‌?

ഇതത്ര വലിയ തെറ്റല്ലെന്നും ഇതിനേക്കാൾ വലിയ തെറ്റാണ്‌ ജോസഫ്‌ മാസ്റ്റർ ചെയ്തതെന്നും അത്കൊണ്ട്‌ കൈവെട്ടിയ വിഷയം വലിയ പ്രശ്നമാക്കേണ്ടതില്ലെന്നും നിങ്ങളുടെ ഒരു നേതാവ്‌ പറഞ്ഞത്‌ ശരിയാണോ?
സാമുദായിക സൗഹാർദ്ദം തകർക്കുന്ന രീതിയിൽ ഇത്തരം അക്രമങ്ങളുണ്ടാകുന്നത്‌ ഗുരുതരം തന്നെയല്ലേ? നിങ്ങളുടെ മതപരമായ വീക്ഷണത്തിൽ തെറ്റേതെന്നതിനേക്കാൾ ഇന്ത്യൻ സാഹചര്യത്തിൽ ഒരു സാമുദായിക കലാപത്തിലേക്ക്‌ നീങ്ങാവുന്ന ഇത്തരം നടപടികൾ അതീവ ഗുരുതരം തന്നെയല്ലേ? ഈ സംഭവത്തിൽ ക്രിസ്തീയ ജനവിഭാഗവും മതനേതൃത്വും സകലരാഷ്ട്രീയപ്പാർട്ടികളും നബിനിന്ദയേ എതിർത്തിട്ടും സംഭവത്തിൽ പ്രതി മാപ്പ്‌ പറഞ്ഞിട്ടും സ്ഥാപനം സസ്പെന്റ്‌ ചെയ്തിട്ടു ം പോലീസ്‌ അറസ്റ്റ്‌ ചെയ്ത്‌ വിചാരണ ചെയ്യുന്നുണ്ടായിട്ടും നടന്ന ഈ സംഭവം ബോധപൂർവ്വം പ്രശ്നം സൃഷ്ടിക്കാൻ ഉദ്ദേശിച്ചാണെന്ന് ഉറപ്പല്ലേ?തികച്ചും ആസൂത്രിതമായി നടത്തിയ ഈ ആക്രമണത്തിന്‌ പിന്നിലെ ഉദ്ദേശ്യം ന്യായമാണെന്ന് നിങ്ങൾ വിശ്വസിക്കുന്നുണ്ടോ?

ഇനി പോപുലർ ഫ്രണ്ടാണ്‌ ഇത്‌ ചെയ്തതെങ്കിൽ അത്‌ തുറന്നു പറയുന്നതല്ലേ സത്യസന്ധത?ഒരു ദൈവിക പ്രവൃത്തി/ജിഹാദ്‌ കുറേ നുണകൾ കൊണ്ട്‌ മറച്ചുവെക്കേണ്ട കാര്യമാണോ? സത്യം ഏത്‌ സ്വേച്ഛാധിപതിയുടേയും മുന്നിൽ തുറന്നു പറയുന്നതാണ്‌ ജിഹാദ്‌ എന്നല്ലേ മതം പറയുന്നത്‌?പിന്നെ നിങ്ങൾ ഈ ജനാധിപത്യസമൂഹത്തുനു മുമ്പിൽ സത്യം പറയാൻ ഭയപ്പെടുന്നതെന്തിന്‌?
കുറ്റം/ജിഹാദ്‌ ചെയ്തവരെ രക്ഷിക്കാനാണ്‌ നുണപറയുന്നതെങ്കിൽ അവർ വിചാരണയും ശിക്ഷയും നേരിടാനും ഏറ്റുവാങ്ങാനും തയ്യാറല്ലാത്ത ദുർബലരായ മുജാഹിദുകളാണോ? ഒരു ജിഹാദീപ്രവർത്തിയെ നുണപറഞ്ഞ്‌ മൂടിവെക്കാനോ തെറ്റിദ്ധരിപ്പിക്കാനോ ഇസ്ലാം അനുവദിക്കുന്നുണ്ടോ?

അധ്യാപകനെ കുട്ടികളുടെ മുന്നിലിട്ട്‌ വെട്ടിക്കൊന്നതും ക്ലസ്റ്റർ യോഗത്തിൽ വെച്ച്‌ അധ്യാപകനെ മർദ്ദിച്ചുകൊന്നതും തങ്ങളല്ല എന്ന് മാർക്ക്സിസ്റ്റുകാരോ ലീഗുകാരോ പറഞ്ഞിട്ടില്ലല്ലോ? ഒന്നുകിൽ ന്യായീകരിക്കും.അല്ലെങ്കിൽ ചെയ്തത്‌ തെറ്റായിപ്പോയെന്ന് ഏറ്റ്‌ പറയും.എന്നാൽ ഓരോ അക്രമവും നടത്തിയ ശേഷം അത്‌ തങ്ങളല്ലെന്നും പോലീസ്‌ തങ്ങളെ വെറുതെ കുടുക്കുകയാണെന്നും പോപ്പുലർ ഫ്രണ്ട്‌ മാത്രം നുണപറയുന്നത്‌ കേൾക്കുമ്പോൾ മാർക്സിറ്റുകാരെക്കാളും ലീഗുകാരെക്കാളും ബി ജെ പി കാരെയുംകാൾ ഭീരുക്കളും നുണയന്മാരുമാണ്‌ നിങ്ങളെന്നല്ലേ മനസ്സിലാക്കാൻ കഴിയുക?അവർ അക്രമത്തെ ന്യായീകരിക്കാൻ ധൈര്യം കാണിക്കുമ്പോൾ പോപ്പുലർ ഫ്രണ്ട്‌ പച്ചക്കള്ളം പറഞ്ഞ്‌ ഇസ്ലാമിനെയും അതിന്റെ ജിഹാദിനെയും നിന്ദിക്കുകയല്ലേ ചെയ്യുന്നത്‌?

ഇനി നിങ്ങൾ പറയുന്നു ഇതൊന്നും വലിയ ചർച്ച ചെയ്യേണ്ട കാര്യമല്ലെന്നും അതിനേക്കാൾ വലിയ മറ്റു പല കാര്യങ്ങളുമുണ്ടെന്ന്.ഏതാണാ വലിയ കാര്യങ്ങൾ?പോപുലർ ഫ്രണ്ടിന്റെ/എസ്‌ ഡി പി ഐ യുടെ പോസ്റ്ററുകളിൽ കാണുന്ന വലിയ അക്ഷരത്തിൽ എഴുതുന്ന വിഷയങ്ങൾ മാത്രമാണോ വലിയകാര്യങ്ങൾ?

സംഘ പരിവാറിന്റെ മറ്റൊരു ഇരയായ കൃസ്ത്യൻ മതവിഭാഗത്തെ മാപ്പിലൂടെയും രഞ്ജിപ്പിലൂടെയും തീർക്കാവുന്ന ഒരു കുറ്റത്തിന്റെ പേരിൽ ശത്രുക്കളാക്കുന്ന നടപടി അവിവേകമല്ലേ?
പ്രവാചകനെ നിന്ദിച്ചവർക്ക്‌ അർഹമായ വിചാരണയോ ശിക്ഷയോ കിട്ടുന്നില്ലെന്ന പരാതിയുണ്ടെങ്കിൽ അതിന്‌ ജനാധിപത്യപരമായ സമരമാർഗ്ഗങ്ങളും പ്രചരണപരിപാടികളും നടത്തി പൊതു അഭ്പ്രായം സ്വരൂപിച്ച്‌ സർക്കാരിൽ സമ്മർദ്ദം ചെലുത്തുകയല്ലേ വേണ്ടിയിരുന്നത്‌? മറ്റ്‌ ചില സന്ദർഭങ്ങളിൽ/ദളിത്‌ ആദിവാസി അടിച്ചമർത്തൽ/സംവരണാദികാര്യങ്ങളിൽ സ്വീകരിക്കുന്ന മനുഷ്യാവകാശപ്രവർത്തകരെയും മറ്റും മുന്നിൽ നിർത്തിയുള്ള സമര രീതി ഇതിൽ എന്തുകൊണ്ട്‌ സ്വീകരിച്ചില്ല?നബിനിന്ദയായത്‌ കൊണ്ട്‌ ഞങ്ങൾ ശിക്ഷ നടപ്പാക്കും എന്നനിലപാട്‌ നിയമ വ്യവസ്ഥയോടുള്ള വെല്ലുവിളിയല്ലേ? സംഘപരിവാരാദികൾ ഇനി അത്‌ ചെയ്യുമ്പോൾ അതിനെ എതിർക്കാൻ നിങ്ങൾക്കിനി ധാർമ്മികാവകാശമുണ്ടോ?

ഇനി നബിയെ നിന്ദിച്ചതിനുള്ള ഇസ്ലാമിക ശിക്ഷയാണ്‌ കൊടുത്തതെന്ന് തുറന്നു പറായാൻ തയ്യാറുണ്ടോ?ഈ വിഷയത്തിൽ മറ്റ്‌ ഇസ്ലാമിക സംഘടനകളുമായി ഒരു തുറന്ന സംവാദത്തിന്‌ പോപുലർ ഫ്രണ്ട്‌ തയ്യാറാണോ?
ഇസ്ലാമിൽ വിചാരണ ചെയ്യാതെ മാപ്പിനവസരം കൊടുക്കാതെ ശിക്ഷിക്കാൻ ഒരു കൂട്ടം ആളുകൾക്ക്‌ അധികാരം നൽകുന്നുണ്ടോ?
ഒരു ഇസ്ലാമിക ഗവണ്മെന്റിനല്ലാതെ ശിക്ഷ വിധിക്കാനും നടപ്പാക്കാനും അധികാരമുണ്ടോ?
വധശിക്ഷക്കർഹമായ പലകുറ്റങ്ങൾക്കും മാപ്പ്‌ കൊടുത്തതിന്‌ പ്രവാചകന്റെ തന്നെ മാതൃകയില്ലേ?
ഇസ്ലാം വാളുകൊണ്ട്‌ പ്രചരിച്ച മതമാണെന്നും സഹിഷ്ണുതയും ക്ഷമ,ആത്മസംയമനം,വിട്ടുവീഴ്ച, വിശാലകാഴ്ചപ്പാട്‌ മുതലായ ഗുണങ്ങൾക്ക്‌ അതിൽ സ്ഥാനമില്ലെന്നും ഉള്ള മറ്റുള്ളവരുടെ മുൻ വിധി ഉറപ്പിക്കാനല്ലേ ഇത്തരം അക്രമങ്ങൾ കാരണമാകുകയുള്ളൂ?
വാൾകൊണ്ട്‌ സംരക്ഷിച്ച്‌ നിർത്താൻ മാത്രം ദുർബലമാണോ അല്ലാഹുവും പ്രവാചകനും സത്യവിശ്വാസവും എന്ന് അമുസ്ലിംകൾക്ക്‌ സംശയമുണ്ടാക്കാനല്ലേ ഇത്‌ ഉതകൂ?മുസ്ലിംകൾ കാടന്മാരാണെന്ന മുൻ വിധി ഉറപ്പിക്കാനല്ലേ സഹായകമാകൂ?

"പോപുലർ ഫ്രണ്ടിന്റെ അധോലോകസമാനമായ ഇടപെടൽ മനുഷ്യത്വത്തിന്‌ വെല്ലുവിളിയാണ്‌.എൻ ഡി എഫ്‌ എന്ന പേരിൽ പ്രവർത്തിക്കുന്ന ഘട്ടത്തിൽ ഒട്ടേറെ പേരെ ക്രൂരമായി കൊലപ്പെടുത്തി.വർഷങ്ങൾക്ക്‌ മുമ്പ്‌ സംസ്ഥാനത്ത്‌ പലയിടത്തും റോഡരികിൽ തലയറുത്ത പട്ടികളുടെ ജഡം കണ്ട്‌ സംശയം തോന്നി അന്വേഷണം നടന്നപ്പോഴാണ്‌ ഈ സംഘത്തിന്റെ ക്രൂരമായ പരിശീലന മുറ പുറത്തറിയുന്നത്‌.പോപുലർ ഫ്രണ്ടുകാർ രാത്രി ഇരു ചക്ര വാഹനങ്ങളിൽ വന്ന് വാൾ കൊണ്ട്‌ തെരുവു പട്ടികളെ കൊല്ലുകയായിരുന്നു.മിന്നലാക്രമണത്തിലൂടെ എങ്ങനെ വെട്ടിക്കൊല്ലാം എന്ന് നായ്ക്കളുടെ തലയറുത്ത്‌ പരിശീലിക്കുകയായിരുന്നു.ഇവർ ബിനാമി ഇടപാടുകൾ,കുഴൽ പണം,കള്ളക്കടത്ത്‌,കള്ളനോട്ട്‌ വിതരണം,വ്യാജ പാസ്പോർട്ട്‌ നിർമ്മാണം തുടങ്ങിയവയാന്‌ പ്രധാന തൊശ്ശ്ഹിൽ.വിദേശത്ത്‌ നിന്ന് കോടിക്കണക്കിന്‌ രൂപയുടെ സഹായം കൈപറ്റുന്നതായും വ്യക്തമായിട്ടുണ്ട്‌"
പോപ്പുലർ ഫ്രണ്ടിനെക്കുറിച്ച്‌ ഒരു പത്രത്തിൽ വന്ന വാർത്തയുടെ ഒരു ഭാഗമാണിത്‌.
ഇതിൽ പറയുന്ന കാര്യങ്ങൾ ശരിയാണോ?കള്ളക്കടത്ത്‌, ഹവാല ഇടപാടുകൾ ഉണ്ടെങ്കിൽ വിദേശപണം കൈപറ്റുന്നു എന്ന് ജനം ധരിച്ചു പോയാൽ തെറ്റു പറയാൻ കഴിയുമോ?
ഇനി ഇത്‌ അടിസ്ഥാന രഹിതമാണെങ്കിൽ തങ്ങളുടെ പ്രവർത്തകരെ ഒരു മുൻ കരുതൽ എന്ന നിലയിലോ തെറ്റിധാരണക്കും ആരോപണത്തിനൂം ഉള്ള സാഹചര്യം ഒഴിവാക്കുന്നതിന്‌ വേണ്ടിയോ അത്തരം തൊഴിലിൽ നിന്ന് മാറി നിൽക്കാൻ നിർദ്ദേശിച്ചു കൂടേ?
തേജസ്‌ പത്രം ഇറക്കാൻ പെട്ടെന്ന് തീരുമാനിച്ചത്‌ പോപുലർ ഫ്രണ്ടിന്റെ ചില നേതാക്കൾ അമേരിക്കയിൽ പോയി വന്നതിന്‌ സേഷമാണെന്ന് ചില മുസ്ലിം സംഘടനാ പ്രവർത്തകർ തന്നെ പറയുന്നതിൽ വല്ല സത്യവുമുണ്ടോ?അങ്ങനെ തങ്ങളുടെ നേതാക്കൾ ആയിടക്കെങ്ങാനും അമേരിക്കയിൽ മറ്റാവശ്യങ്ങൾക്കായിട്ടെങ്കിലും യദൃശ്ചയാ പോയിട്ടുണ്ടോ?
ഇനി പട്ടികളുടെ തലവെട്ടിയകാര്യം സത്യമാണോ?സത്യമാണെങ്കിൽ പരിശീലനത്തിനായി ദൈവം കൊടുത്ത ജീവനെടുക്കുന്നതിനെ ഇസ്ലാം അനുവദിക്കുന്നുണ്ടോ? അകാരണമായി ജീവനെ കൊല്ലുന്നത്‌ നിഷിദ്ധമല്ലേ?

യുദ്ധ സാഹചര്യത്തിലാണ്‌ ഖുർ-ആൻ അക്രമം അനുവദനീയമാക്കിയതെന്ന് പണ്ഠിതന്മാർ പറയുന്നു. അങ്ങനെയെങ്കിൽ പോപ്പുലർ ഫ്രണ്ട്‌ ഇപ്പോൾ യുദ്ധസാഹചര്യത്തിലാണ്‌ മുസ്ലിംകൾ എന്ന് കരുതുന്നുണ്ടോ?ഉണ്ടെങ്കിൽ അത്‌ തുറന്നു പറയുമോ? ഖുർ-ആൻ അതൊരിക്കലും രഹസ്യമാക്കി വെച്ചിരുന്നില്ല.ഏവരും പാരായണം ചെയ്യുന്ന ഖുർ-ആൻ വചനമായി അത്‌ പരസ്യപ്പെടുത്തുകയാണ്‌ ചെയ്തത്‌.ഖുർ-ആന്റെ തുറന്ന സമീപനത്തിനു പകരം എല്ലാം നിഗൂഢമായി ചെയ്യുന്നത്‌ ഖുർ-ആൻ വിരുദ്ധമല്ലേ?

അൽഖ്വയ്ദയെപ്പോലെ, ഇസ്ലാമികവിരുദ്ധമെന്ന് വിലയിരുത്തി ഇന്ത്യൻ നിയമവ്യവസ്ഥക്കെതിരെ നിരന്തരം യുദ്ധം ചെയ്യണമെന്ന വിശ്വാസം പോപുലർ ഫ്രണ്ട്‌ വെച്ചു പുലർത്തുന്നുണ്ടോ? എങ്കിൽ പുറത്ത്‌ കപടമുഖാവരണം അണിയാതെ അത്‌ അൽഖ്വയ്ദയെപ്പോലെ അത്‌ തുറന്നു പറയാൻ സന്നദ്ധ്മാവേണ്ടതല്ലെ?
ഇസ്ലാമിന്‌ വേണ്ടി ആറെസ്സെസ്‌ ശൈലിയിൽ അർദ്ധസൈനികസ്വഭാവത്തോടെ പ്രതിരോധ സംഘടനയുണ്ടാക്കുന്നത്‌ ഇന്ത്യൻ ജനാധിപത്യവ്യവസ്ഥിതിയിൽ വിശ്വാസമില്ലാത്തത്‌ കൊണ്ടോ നഷ്ടപെട്ടത്‌ കൊണ്ടോ ആണോ?
ഇന്ത്യയെ പോലെ അതിശക്തമായ ഒരു രാജ്യത്തിന്റെ പോലീസുമായും പട്ടാളവുമായും നേരിടാമെന്നത്‌ വ്യാമോഹം മാത്രമല്ലെ? മറിച്ച്‌ സിവിലിയൻ അക്രമങ്ങൾ ആസൂത്രണം ചെയ്ത്‌/ശത്രുക്കളെ പ്രത്യാക്രമണം നടത്തി ക്രമസമാധാനം തകർക്കൽ മാത്രമാണോ ലക്ഷ്യം?എങ്കിൽ അത്‌ ഫാസിസത്തിന്‌ സൗകര്യം ചെയ്തു കൊടുക്കൽ മാത്രമല്ലേ?ഇന്ത്യയിൽ ജനാധിപത്യം തകർന്നാൽ ഏറ്റവും കൂടുതൽ വേട്ടയാടപ്പെടുക മുസ്ലിം കളായിരിക്കും എന്നതല്ലേ സത്യം?അപ്പോൾ ജനാധിപത്യത്തിന്‌ നേരിയ പോറലേൽക്കുന്ന നടപടിയിൽ നിന്നുപോലും മാറിൽക്കുക,സമാധാന മാർഗ്ഗങ്ങളിലൂടെ പ്രതിഷേധം രേഖപ്പെടുത്തുക ഇതല്ലേ വിവേകമുള്ള മുസ്ലിം കൾക്ക്‌ കരണീയമായിട്ടുള്ളത്‌?
പാകിസ്ഥാനിൽ പോലും അക്രമജിഹാദിന്‌ വിജയം വിദൂരമാണെന്നിരിക്കെ ഇന്ത്യയിൽ അതെന്തു നേടാനാണ്‌?
തമിഴ്‌ പുലികളുടെ പതനം ഹിംസയുടെ മാർഗ്ഗം സ്വീകരിക്കുന്നവർക്ക്‌ ഒരു പാഠമാകേണ്ടതല്ലേ?
ഇനി വിജയമല്ല ജിഹാദ്‌ നടത്തുക മാത്രമേ വേണ്ടതുല്ലൂ എങ്കിൽ പിന്നെയീ ഒഴിഞ്ഞു മാറലും നുണപറയലും എന്തിനാണ്‌?ധീരമായി പ്രത്യാഘാതങ്ങൾ നേരിട്ടാൽ പോരെ?ക്വട്ടേഷൻ ഗുണ്ടകളുടെ മാതൃകയിൽ പുറത്തിറങ്ങി കുറ്റം ചെയ്തില്ലെന്ന് പറഞ്ഞ്‌ ഞെളിഞ്ഞ്‌ നടക്കുന്ന രീതി ശരിയാണോ?

എൻ ഡി എഫ്‌ എന്ന സംഘടന രൂപീകരിച്ചപ്പോൾ അത്‌ മനുഷ്യാവകാശ സംഘടനയാണെന്നാന്‌ പറഞ്ഞത്‌.ഒരു ചാനൽ ചർച്ചയിൽ പോപുലർ ഫ്രണ്ട്‌ സാമൂഹ്യ സംഘടനയാണെന്നാണ്‌ അതിന്റെ ഒരു നേതാവ്‌ പറഞ്ഞത്‌.ഇതൊരു ഇസ്ലാമിക സംഘടനയാണോ?നാഷണൽ എന്ന വാക്ക്‌ ഉപേക്ഷിച്ചത്‌ അത്‌ നിങ്ങളുടെ വീക്ഷണത്തിലുള്ള ഇസ്ലാമിന്‌ വിരുദ്ധമായത്‌ കൊണ്ടാണോ?എങ്കിൽ പോപുലർ,സോഷ്യൽ ഡെമോക്രാറ്റിക്‌ എന്നീ വാക്കുകളും അങ്ങനെ തന്നെയല്ലേ? ഇനി നിങ്ങൾ വെച്ചുപുലർത്തുന്ന ഇസ്ലാമികവീക്ഷണത്തിന്‌ ഈ വാക്കൊന്നും എതിരല്ലേ?

നിങ്ങൾ ഒരു ഇസ്ലാമിക സംഘടനയാണെന്ന് തുറന്നു പറയാത്തതെന്താണ്‌?നിങ്ങളുടെ ഭരണഘടനയും നയപരിപാടികളും അച്ചടിച്ച്‌ വിൽക്കുന്നുണ്ടോ? ഇല്ലെങ്കിൽ അതെന്തുകൊണ്ടാണ്‌?

അവസാനം

ഏറ്റവും പ്രധാനമായി പോപുലർ ഫ്രണ്ടിന്റെ പ്രവർത്തകരോടും അഭ്യുദയകാംക്ഷികളോടും ചോദിക്കാനുള്ളത്‌/ചോദിക്കേണ്ടത്‌ ഇതാണ്‌.നിങ്ങളാണ്‌ ജോസഫ്‌ മാഷുടെ കൈവെട്ടിയതെങ്കിൽ/അതു പോലെ മറ്റക്രമങ്ങൾ നടത്തുന്നുവെങ്കിൽ അതിന്റെ ഉത്തരവാദിത്തം ധൈര്യപൂർവ്വം ഏറ്റെടുക്കുന്നില്ല? അത്‌ ചെയ്യാതെ തങ്ങളല്ലെന്ന് നുണപറഞ്ഞ്‌ അക്രമത്തെ വളഞ്ഞവഴിയിൽ ന്യായീകരിക്കുകയോ നിസ്സാരവൽക്കരിക്കുകയോ ചെയ്യുന്നത്‌ പൊതു സമൂഹത്തോടും ദൈവത്തോടും ചെയ്യുന്ന വഞ്ചനയല്ലേ? നിങ്ങൾക്ക്‌ ദൈവത്തെ മാത്രമേ ഭയമുള്ളുവെങ്കിൽ കാപട്യമെന്തിന്‌? അപ്പോൾ നിങ്ങളാരെയോ ഭയക്കുന്നുണ്ട്‌. അല്ലെങ്കിൽ നുണപറഞ്ഞ്‌/തെറ്റിദ്ധരിപ്പിച്ച്‌ കോടതിയും ഇന്ത്യൻ ജനാധിപത്യവ്യവസ്ഥിതിയും നൽകുന്ന സൗകര്യങ്ങൾ(ഭൗതിക സൗകര്യങ്ങൾ) തട്ടിയെടുക്കാൻ അനിസ്ലാമിക മാർഗ്ഗം സ്വീകരിക്കുന്നു.ജിഹാദികൾ ഭൊതിക സൗകര്യങ്ങൾക്കു വേണ്ടി നുണ പറഞ്ഞാൽ അത്‌ പിന്നെന്ത്‌ ജിഹാദാണ്‌?

എൻ ഡി എഫും പോപുലർ ഫ്രണ്ടും ഈ വകയിൽ എത്ര നുണപറഞ്ഞിട്ടുണ്ട്‌? ഓരോ പ്രവർത്തകനും ഇരുന്നു കണക്കു കൂട്ടി നോക്കൂ.നുണയുടെ ഊന്നു വടിയിൽ മാത്രം അധിഷ്ഠിതമായ ഈ ജിഹാദ്‌ യഥാർത്ഥ ജിഹാദ്‌ ആകുമോ?

നുണജിഹാദെന്നോ ക്വട്ടേഷൻ ജിഹാദെന്നോ ഇതിനെ ആരെങ്കിലും വിളിച്ചാൽ തെറ്റെന്നു പറയാൻ കഴിയുമോ?

പോപുലർ ഫ്രണ്ടിന്റെ വക്താക്കൾ ഇതിനൊക്കെ സുവ്യക്തമായ മറുപടി പൊതുസമൂഹത്തിന്റെ മുമ്പിൽ വെക്കുന്നില്ലെങ്കിൽ അവരെക്കുറിച്ച്‌ സമുഹത്തിനുള്ള ധാരണ തെറ്റെന്നു പറയാനാവില്ല.
..........................................................................................................................................................................................................................._____________________________________________________________________________________________________________..
ഈ വിഷയത്തിൽ സംവാദം എന്ന ബ്ലോഗിൽ ഇ എ ജബ്ബാറിന്റെ പോസ്റ്റിനോട് പ്രതികരിച്ച് ഞാൻ കൊടുത്ത കമ്മെന്റുകൾ ക്രമത്തിൽ താഴെ കൊടുക്കുന്നു.

1-ഇപ്പോൾ വ്രണപ്പെടുന്ന വികാരങ്ങൾ മാത്രമാണ് എല്ലാവരുടെയും ആകെപ്പാടെയുള്ള കൈമുതൽ.കോൺഗസ്സുകാർക്ക് ഗാന്ധിയുടെ വിവേകമോ ക്ഷമയോ അഹിംസയോ സംയമനോ അല്ല പ്രവൃത്തിമാർഗ്ഗം.രാജീവ് ഗാന്ധിയെ ആരെങ്കിലും വിമർശ്ശിച്ചാൽ അവർക്ക് വികാരമിളകും.

മാർക്സിസ്റ്റുകാർ സ്വന്തം നേതാക്കൾ മതഗുരുക്കന്മാരെ പോലെ ആത്മീയ സദാചാര വിശുദ്ധരായിരുന്നെന്ന് ധരിച്ചുവശായിരിക്കുന്നു.മതഗുരുക്കന്മാർ അങ്ങനെയായിരുന്നോ എന്ന് വേറെ ചോദിക്കണം.വികാരമാണ് അവർക്കും വ്രണപ്പെടാനുള്ളത്.

മാതൃഭൂമിയിൽ തൊഗാഡിയക്കെതിരെ ലേഖനം വന്നപ്പോൾ വി എച് പി ക്കാർ ഹാലിളകി.സ്വന്തം പത്രമാഫീസുകളിലേക്ക് വല്ല മാർക്സിസ്റ്റുകാരുമാണ് രോഷപ്രകടനം നടത്തിയിരിന്നെങ്കിൽ മാതൃഭൂമി ഇതിത്ര പ്രാധാന്യം കുറച്ചായിരിക്കുമോ റിപ്പോർട്ട് ചെയ്യുക.തൊഗാഡിയയെ ഒറ്റദിവസം കൊണ്ട് വിസ്മൃതിയിലാക്കാൻ മതേതര മാധ്യമങ്ങൾക്കെന്തൊരു ശുഷ്കാന്തി!

മുഹമ്മദ് നബി ക്ഷമയുടെയും സഹനത്തിന്റെയും മാപ്പ് കൊടുക്കാലിന്റെയും ഒട്ടേറെ മാതൃകകൾ കാണിച്ചു തന്നിട്ടുണ്ട്.അതിനെ നമ്മൾ ഉയർത്തിക്കാടണം.ജിഹാദിന്റെ ആത്മീയതയെ കൈവെടിഞ്ഞ് അതിന്റെ ഭൗതികതക്ക്(അക്രമം)പിന്നാലെ പോകുന്നവരാണ് തീവ്രവാദികൾ.അവർ മതവിരുദ്ധരാണ്.രാമനെ രാഷ്ട്രീയായുധമാക്കുന്നവരും വിപണന വസ്തുവാക്കുന്നവരുമാണ് യഥാർത്ഥ ഭൗതികവാദികൾ എന്ന് സ്വാമി അഗ്നിവേശ് ഒരു ലേഖനത്തിൽ പാറഞ്ഞതായി ഓർക്കുന്നു.അതു തന്നെയാണ് ഇസ്ലാമികതീവ്രവാദികൾക്കും ചേരുക.

കളിയാക്കിയാൽ കൈവെട്ടണമെന്ന് നബി പ്രഞ്ഞിട്ടുണ്ടോ?ഇല്ല അങ്ങനെ പറഞ്ഞിട്ടുണ്ടെങ്കിൽ ചെയ്തവർ ആണുങ്ങളാണെങ്കിൽ അത് പറയട്ടേ.അവർ പറയില്ല.കാരണം അവർ ഭീരുക്കളാണ്.ഇസ്ലാമിൽ ഏറ്റവും വലിയ ജിഹാദ് ഏതവന്റെ മുന്നിലും സത്യം തുറന്ന് പറയലാണ്.തങ്ങൾ ചെയ്തത് ശരി-അത്ത് വിധി നടപ്പാക്കലാണെന്ന് ചെയ്തവർ പറയാൻ തയാറാകുന്നില്ല.പകരം കുറേ നുണകളിലൂടെ ,വളച്ചുകെട്ടിപ്പറഞ്ഞ് തങ്ങൾ ചെയ്തത് ശരിയാണെന്ന് അല്ലെങ്കിൽ അത്ര വലിയ തെറ്റല്ലെന്ന് വരുത്തിതീർക്കാനാണ് ശ്രമിക്കുന്നത്.

അപ്പോൾ ഇത് ഇസ്ലാമിനു വേണ്ടിയുള്ള യുദ്ധമല്ല.മറ്റാർക്കോ വേണ്ടിയുള്ളതാണ്.നാദാപുരത്തും മാറാടും നടന്ന വർഗ്ഗീയധ്രുവീകരണ അജണ്ട അവർ നടപ്പാക്കുകയാണ്.മഞ്ചേരിയിൽ നിന്ന് ഫാതർ അലവിക്കെതിരെ തുടങ്ങിയ ക്രിസ്ത്യൻ വിരുദ്ധത ജോസഫ് മാഷിൽ വന്നു നിൽക്കുന്നു.ഇതിനവർ നടത്തുന്ന പ്രചരണ,പ്രോപഗണ്ടകളും പ്രയോഗവും സംഘപരിവാർ ഒറീസയിലും ഗുജറാത്തിലും മറ്റും നടത്തിയ ക്രിസ്റ്റ്യൻ വിരുദ്ധത അതേ പടി മാതൃകയാക്കുകയാണവർ ചെയ്യുന്നത്.

മുസ്ലിം തീവ്രവാദികൾ സംഘപരിവാറിന്റെ ശിഷ്യന്മാരാണെന്നതാണ് സത്യം.അധികാര,അധോലോക,വിദേശ പണ താൽപര്യങ്ങൾക്ക് വേണ്ടി നടപ്പാക്കപ്പെടുന്ന ഇത്തരം വർഗ്ഗീയ അജണ്ടകളെ തുറന്നു കാണിക്കുന്നതിനു പകരം ഇതിനെ ഖുർ-ആനുമായി കൂട്ടിക്കെട്ടിന്നത് അക്രമികളെ സഹായിക്കുക മാത്രമേ ചെയ്യൂ.യുക്തി വാദികളും ശുദ്ധമതേതര വാദികളും തിവ്രവദികളുടെ ആശയപ്രചാരകരും സഹായികളും ആകരുത്.

മതത്തിൽ സമാധാനത്തിന്റെ പാതകൾ നിരവതിയുണ്ടെന്ന് മറച്ചു വെക്കുന്നത് അക്രമികളെ മാത്രമേ സഹായിക്കൂ.ഹിന്ദുമതവും ഗാന്ധിസവും മാർക്സിസവും ഇന്ന് വൈകാരികതക്കും അക്രമത്തിനും മുന്തൂക്കം നൽകുന്നുവെങ്കിൽ കാരണം തിരയേണ്ടത് മതത്തിലല്ല. മേറ്റ്വിടെയോ ആണ്.അല്ലെങ്കിൽ നമ്മളിലോരോരുത്തരിലും തന്നെയാണ്.

നമ്മുടെ ഭാഷ പോലും സൗമ്യമല്ലാത്തവിധം ഹിംസയുടെ സ്വാധീനത്തിലാണ്.മതേതരത്വത്തെ കുറിച്ചും സഹിഷ്ണുതയെ കുറിച്ചും സമാധാനത്തെ കുറിച്ചുപോലും ഞാനടക്കം വികാരം കൊള്ളുമ്പോൽ അതിൽ പ്രതിഹിംസയുടെ ബീജങ്ങൾ പതുങ്ങിയിരിക്കുന്നു എന്ന് എനിക്ക് തോന്നാറുണ്ട്.

2-ജോസഫ് മാഷിന് വെട്ടേൽക്കുമ്പോൾ ആ ചെയ്തകൃത്യം ശരിയോ തെറ്റോ എന്ന പ്രശ്നം തന്നെയാണ് മുഖ്യമായും ചർച്ച ചെയ്യേണ്ടത്.അത് നമുക്ക് മറ്റാരോടെങ്കിലും കണക്കു തീർക്കാനുള്ള അവസരമായി എടുക്കരുത്.പുര കത്തുമ്പോൾ വാഴ വെട്ടരുത്.

യുക്തിവാദികളുടെ മാനവികത അംഗീകരിക്കുന്നു.എന്നാൽ അവർക്കേ അതുള്ളൂ അല്ലെങ്കിൽ അതിണ്ടാകൂ എന്ന മുൻ വിധി ജനാധിപത്യ വിരുദ്ധമാണ്.ഗ്ഗാന്ധിയെപോലെ നിരവധി ഹിന്ദു,മുസ്ലിം,ക്രിസ്ത്യൻ പുണ്യാത്മാക്കൾ കടന്നു പോയിട്ടുണ്ട്.

ജോസഫ് മാഷ് ദൈവത്തിനോട് ചേർത്ത് പറഞ്ഞ മുഹമ്മദ് പ്രവാചകൻ അല്ലായിരിക്കാം.ആയിരിക്കാം.അദ്ദേഹത്തിന്റെ മനസിലുള്ളത് ദൈവത്തിനേ അറിയൂ.പക്ഷേ മുഹമ്മദിന് പകരം ഒരു ജോസഫ് ആകാതിരുന്നത് മതപക്ഷപാതിത്വം കൊണ്ടുമാകാം.പ്രശ്നം അതല്ല.ഇതിനു പിന്നിൽ ചില അജണ്ടകൾ ഉണ്ടായിക്കൂടേ?

കേരളത്തിൽ ഒരു ക്രിസ്ത്യൻ തീവ്രവാദ സംഘടന കൂടി ഉണ്ടാവാൻ അനൂല സാഹചര്യമൊരുക്കലാകുമോ ഇത്?അമേരിക്കൻ,സൗദി പി ന്തുണയോടെ ഇങ്ങിനൊരുശ്രമം നടന്നു കൂടായ്കയില്ല.പോപുലർ ഫ്രണ്ടിന്റെ ഫണ്ടും അതിന്റെ അജണ്ടയും ഇസ്ലാമിൽ ഒതുങ്ങി നിൽക്കുന്നില്ല.അവർ തേജസ് പത്രമാക്കിയത് പോലും അവരുടെ ചില നേതാകന്മാർ അമേരിക്കയിൽ പോയി വന്നതിന് തൊട്ടു പിന്നാലെ യാണെന്ന് എന്റെ ഒരു സുഹൃത്ത് പറഞ്ഞത് ഓർത്തു പോകുന്നു.

കേരള കോൺഗരസ്സുകളുടെ ലയനത്തിനു പിന്നിൽ അമേരിക്കൻ എംബസ്സിക്കുള്ള പങ്കിനെക്കുറിച്ചും വാർത്ത വന്നിരുന്നു.ഇന്ത്യയിലെ അമേരിക്കൻ എംബസ്സിയിൽ നിന്ന് ചിലർ കേരളത്തിലെ സഭാപുരോഹിതന്മാരെ വന്നു കണ്ടിരുന്നു പോലും.

ഡച്ചു കാർട്ടൂൺ വിവാദം പോലെ ഒരു അജണ്ട കേരളത്തിൽ ആസൂത്രിതമായി രൂപപ്പെടുത്താൻ പിന്നിൽ നിന്ന് ആരെങ്കിലും ചരട് വലിക്കുന്നുണ്ടോ?

മുസ്ലിം തീവ്രവാദികൾ അമേരിക്കയുടെ കയ്യിലെ കളിപാവകളാണ് ഇന്നും.

വിചാരണകൂടാതെ ശിക്ഷ ഔദ്യോഗിക ഇസ്ലാമുകളൊന്നും അംഗീകരിക്കുന്നില്ല.കൊലപാതകത്തിനു പോലും മാപ്പ് കൊടുക്കാൻ അതിൽ പഴുതുണ്ട്. അപ്പോൾ മതവിരുദ്ധമായ ഈ വിധി നടപ്പാക്കലിനു പിന്നിൽ പ്രവർത്തിച്ചവർ ക്രിമിനലുകളാണ്.അവർക്ക് മതത്തിന്റെ ഒരാനുകൂല്യവും നമ്മൾ കൊടുത്തു കൂടാ.

സൂക്ഷ്മതയില്ലാത്തവരും ദൈവം നൽകിയ ജീവന് വില കൽപിക്കാത്തവരുമാണവർ.അതുകൊണ്ട് തന്നെ അവർ ദൈവ ധിക്കാരികളാണ്. മതത്തിന് അപമാനമുണ്ടാക്കിയ മതനിന്ദകരാണ്.

അവരുടെ അജണ്ട ഭീകരമായ മേറ്റ്ന്തോ ആണ്.അവരുടെ നീക്കങ്ങളെ സുസൂക്ഷ്മം പഠിക്കുക.ജനങ്ങളും പാർട്ടികളും ശരീക് കണ്ൺ തുറക്കുക.കേരളത്തിൽ ഒരു വർഗ്ഗീയ കലാപത്തിന്റെ കൂടി സാധ്യത എവിടെയോ മണക്കുന്നുണ്ട്. ദൈവമേ ദുഷ്ടന്മാരുടെ അത്തരം എല്ലാ ശ്രമങ്ങളും പാഴായിപ്പോകട്ടെ.

3-ക്വട്ടേഷൻ ജിഹാദ്

കേരളം താലിബാനിസത്തിലേക്ക് പോകുകയാണോ എന്ന ചോദ്യം പലരും ഉയർത്തിയിരിക്കുന്നു.

ശരിയാണ് ഇത് താലിബാനിസത്തിന്റെ നഗ്നമായ പ്രയോഗം തന്നെയാണ്.ഒരധ്യാപകനെ അയാൾ ചെയ്തകുറ്റത്തിന് പോലീസ് പ്രതിയാക്കിക്കഴിഞ്ഞിട്ടും അയാൾ ചെയ്തതെറ്റിൽ മാപ്പ് പറഞ്ഞിട്ടും അയാളെ അക്രമിച്ചത് ശരിയായോ? ഇല്ല.ഒട്ടു ശരിയായില്ല. അയാൾ മാപ്പു പറഞ്ഞിട്ടില്ലെങ്കിലും നിയമം കയ്യിലെടുക്കുന്നത് കുറ്റകരമാണ്.പോലീസും സർക്കാരും പ്രതിയെ സംരക്ഷിക്കുന്ന നിലപാട് എടിത്താൽ തന്നെയും അതിനെ ചെറുക്കാൻ/തുറന്നു കാണിക്കാൻ ജനാധിപത്യ മാർഗ്ഗങ്ങളില്ലേ?

ഇതിൽ പിടിക്കപ്പെട്ടവർ പോപ്പുലർ ഫ്രണ്ടുകാരാണെന്നാണ് പോലീസ് പറയുന്നത്.അവർ നിഷേധിച്ചിരിക്കുന്നു.അവർ ഏറ്റു പറഞ്ഞാലേ കേരളീയർ ഇത് വിശ്വസിക്കാവൂ എന്ന തീവ്രവാദിന്യായം കേരളം വിഡ്ഢികളുടെ ലോകമാകുന്നതുവരെ വിലപ്പോകില്ല.അവരുടെ ന്യായം കേട്ടാൽ ഇതുവരെ ഒരു തെറ്റും അക്രമവും ചെയ്യാത്ത പാവങ്ങളാണെന്ന് തോന്നും.

ഫക്കീറുപ്പാപ്പാനെ വെട്ടിയിട്ട് ഇവരെന്താ പറഞ്ഞത്? അങ്ങനെ ഒരീച്ചയെപോലും ദ്രോഹിക്കാത്ത ഇവരെ പോലീസ് പീഡിപ്പിക്കുന്നത് കഷ്ടം തന്നെ.പാവങ്ങൾ.

തങ്ങളാണിത് ചെയ്തതെങ്കിൽ അത് ചെയ്തത് ശരിയാണെന്ന് ഓരോ എൻ ഡി എഫുകാരനും ഉറച്ചു വിശ്വസിക്കുന്നുണ്ടാവും.അവരെങ്കിലും ഇത് വായിച്ച് പ്രതികരിക്കും എന്ന് കരുതട്ടേ.

ചെയ്തത് പോപുലർ ഫ്രണ്ടല്ലെന്നാണ് ആണയിട്ട്, ദൈവത്തെ പിടിച്ച് സത്യം ചെയ്തതു പറയുന്നെങ്കിൽ പോപുലർ ഫ്രണ്ട് ഈ ചെയ്തതിലെ മതവിരുദ്ധതയും നീതികേടും എടുത്തുകാട്ടി ഒരു കാമ്പൈൻ നടത്തുമോ?

ഇന്ത്യൻ നിയമവും കോടതിയും ഞങ്ങൾക്ക് പുല്ലാണ്.ഞങ്ങൾ ഞങ്ങളുടെ വിധി നടപ്പാക്കും എന്ന ധിക്കാരം മതം അംഗീകരിക്കുന്നുണ്ടോ?

ഒരാൾ മുഹമ്മദ് നബിയെ നിന്ദിച്ചാൽ അയാൾക്കുള്ള ശിക്ഷ കൈവെട്ടാണോ?

മുഹമ്മദ് നബിയെ നിന്ദിച്ചാൽ കുറ്റമാകുമെങ്കിൽ അതിന്റെ ശിക്ഷനടപ്പാക്കാനുള്ള അധികാരം ആർക്കാണ്? അതിന് ഇവിടെ ഒരു ഇസ്ലാമിക ഗവർമ്മെന്റല്ലല്ലോ ഉള്ളത്?

എം എഫ് ഹുസൈൻ സരസ്വതിയെ 'നിന്ദിച്ച'തിന് ആറെസ്സെസിനെ ശിഷിക്കാൻ അനുവദിക്കാമോ?

പോപ്പുലർ ഫ്രണ്ട് ആദിവാസി,ദളിത് പ്രശ്നങ്ങൾ പറയാറുണ്ടല്ലോ.വർക്കല സംഭവത്തിൽ പോലീസ് കാണിച്ച അതിക്രമങ്ങൾക്കെതിരെ ഇത്തരം ഒരാക്രമണം അവർ നടത്താഞ്ഞതെന്താണ്.അവരുടെ കാര്യത്തിൽ മനുഷ്യാവകാശം,മനുഷ്യാവകാശപ്രവർത്തകർ.തെളിവെടുപ്പ് അതൊക്കെ.നബിയെ നിന്ദിച്ച കേസാണെങ്കിൽ അതൊന്നുമില്ല.ഒറ്റ വെട്ട്. ഈ തട്ടിപ്പ് തുറന്ന് കാണിക്കണം.

പോപ്പുലർ ഫ്രണ്ടിനെതിരെ അവരെ ശരിക്കും ഒട്ടപെടുത്താനും പ്രതിരോധിക്കാനും ബുധിജീവികളും രാഷ്ട്രീയകാരും ഇത്തരം നൂറ് ചോദ്യങ്ങളുമായി രംഗത്തുവരേണ്ട സന്ദർഭമാണിത്.മത നേതൃത്വങ്ങളെ അത്തരം ചോദ്യങ്ങൾ ചോദിക്കാൻ പ്രേരിപ്പിക്കും വിധം ഒരിടപെടൽ പ്രമുഖരാരെങ്കിലും നടത്തണം. വെറുതെ ഇസ്ലാമിനെ പ്രതിക്കൂട്ടിൽ കയറ്റി നല്ലൊരു അവസരം സാംസ്കാരിക കേരളം കളഞ്ഞു കുളിക്കരുത്.

4-മാപ്പ് പറഞ്ഞാലൊന്നും ഈ ക്വട്ടേഷൻ ജിഹാദികൾക്ക് സമാധാനമാവില്ല.രക്തം കൊണ്ടേ അവർ അടങ്ങൂ.ആരും പോപ്പുലർ ഫ്രണ്ടിന്റെ പേർ പറയാത്തത് എന്നെ അത്ഭുതപ്പെടുത്തുന്നു.പിടിക്കപ്പെട്ടത് അവരാണെന്ന സ്ഥിരീകരണം കിട്ടാത്തത് കൊണ്ടാണെന്ന് സമാധാനിക്കട്ടെ.പോലീസ് അന്വേഷണം കഴിഞ്ഞല്ലേ ഉറപ്പിച്ച് പറയാൻ കഴിയുകയുള്ളൂ അല്ലേ. സമ്മതിക്കുന്നു.ഇത് ആറെസ്സെസ്സിന്റെ കാര്യത്തിലും നാം പാലിക്കാറുണ്ടോ?

എം ഫ് ഹുസൈന്റെ വിഷയത്തിൽ നാം സംഘപരിവാർ,ശിവസേന സംഘടനകളെ പേരെടുത്തു പറയുന്നു.ഹിന്ദുക്കൾ എന്ന് പറയാറില്ലല്ലോ.ഹിന്ദു സങ്കൽപങ്ങളിലെ ഹിംസ ചൂണ്ടിക്കാട്ടി ഹിന്ദു സമം മതഭ്രാന്ത് എന്നു പറയാറില്ല.

എന്നാൽ ഇവിടെ ഇസ്ലാ/ഖുർ-ആനിലെ ചില ഹിംസാവാക്യങ്ങൾ ചൂണ്ടിക്കാട്ടി നാം ഇസ്ലാം സമം മതഭ്രാന്ത് എന്ന് വിധിയെഴുതുന്നു.ജോസഫ് മാസ്റ്റർ ആക്രമിക്കപ്പെട്ടതും ആ കണക്കിൽ എഴുതുന്നു.ഇതിലൊരു ഇരട്ടത്താപ്പില്ലേ? മതഗ്രന്ഥങ്ങളിലെ ഹിംസ എല്ലാ മതത്തിനും ബാധകമാകാതെ അത് ഇസ്ലാമിന് മാത്രം ബാധകമാക്കുന്നത് അനീതിയല്ലേ?

ഈ പ്രശ്നത്തിൽ കാടടക്കി വെടിവെച്ച് അക്രമികളെ സഹായിക്കുന്ന നിലപാടെടുക്കരുത്.ചെയ്ത സംഘടന/അതിന്റെ പ്രവർത്തന രീതി ഇതിനെ ചുറ്റി പറ്റിയല്ലേ പ്രധാനമായും ചർച്ച നടക്കേണ്ടത്?

നുണപറയലിൽ അധിഷ്ഠിതമായ ഇസ്ലാമിക തീവ്രവാദം ആത്മീയദാരിദ്ര്യം കൊണ്ടാണ് നയിക്കപ്പെടുന്നത്.

5-അപ്പോ കൽപിതോ,

ഇത് സംയമനത്തിന്റെ ഇസ്ലാമിക ഭാഷയല്ല.സവാദത്തിന്റെ വിവേകഭാഷ യുക്തിവാദിക്കോ മറ്റുള്ളവർക്കോ അറിയില്ലെങ്കിൽ അത് പ്രവൃത്തിയിലൂടെ കാണിച്ചു കൊടുക്കേണ്ടത് യഥാർത്ഥ മുസ്ലിമെന്നവകാശപ്പെടുന്നവരാണ്.ബ്ലോഗിലെ ചർച്ചയിൽ പങ്കെടുക്കുന്ന മതവിശ്വാസികൾ വൈകാരികതയുടെ ഭാഷയിലൂടെ മതത്തെ പ്രതിരോധിക്കുന്നത് കണ്ട് ഞാൻ അസ്വസ്ഥനായിട്ടുണ്ട്.എതിരാളിയുടെ മുൻ വിധികളെ ഉറപ്പിക്കാൻ മാത്രമേ ഇതുപകരിക്കൂ.

ഒരു പക്ഷേ അവരൊക്കെ വിശ്വസിക്കുന്നത് ഹിംസാത്മകമായ ഒരു മതത്തിൽ തന്നെയോ എന്ന് സന്ദേഹി പോലും സംശയിച്ചിട്ടുണ്ട്.ആർദ്ദ്രതയുടെ ഒരു ഇസ്ലാമിനെ പ്രവൃത്തിയിലൂടെ വാക്കുകളിലൂടെ പരിചയപ്പെടുത്താൻ ഏവർക്കും കഴിഞ്ഞിരുന്നെങ്കിൽ എന്നാശിച്ചു പോയിട്ടുണ്ട്.അതിന് ക്ഷമ വേണം.അത് ഇമാനിന്റെ/വിശ്വാസത്തിന്റെ പകുതിയാണെനാണല്ലോ ഇസ്ലാം പറയുന്നത്.

സ്വന്തം വികാരാധിക്യത്തോട് ജിഹാദ് നടത്തി പരാചയപ്പെട്ടവർ അല്ലെങ്കിൽ അത് തീരെ ചെയ്യാത്തവർ ദീനിന് വേണ്ടി നടത്തുന്ന വൈകാരിക ജിഹാദ് ഈമാനികമല്ല.കൈവെട്ടൽ പോലെ അത് സാത്താനികമാണ്.

സതയോട്,

ഹിന്ദു വർഗ്ഗീയവാദം എഴുത്തുകാർക്കും സിനിമക്കും സംഗീതക്കചേരികൾക്കും എതിരെ ആക്രമണങ്ങൾ അഴിച്ചു വിട്ടതിന്റെ ഉദാഹരണം നിരത്തിയാൽ തീരാത്തത്രയുണ്ട്.മുസ്ലിമിന്റെ തലയിലിടാൻ മുസ്ലിം ഭീകരവാദ മോഡലിൽ സ്ഫോടനങ്ങൾ വരെ നടത്തിയത് വേറേ.

തൊഗ്ഗാഡിയ യഥാർത്ഥത്തിൽ ചെയ്ത പ്രസംഗം അപ്പടി കൊടുത്ത മാതൃഭൂമിക്കെതിരെ രോഷപ്രകടനം നടത്തിയിട്ട് ദിവസങ്ങളേ ആയുള്ളൂ.തൊഗാഡിയ അവതാരമോ ആത്മീയചാര്യനോ അല്ലല്ലോ.എന്നിട്ടും അതുണ്ടായി.

6-സത., അതെ വണ്ടി വിടുകയാണ്.ഇവിടെ മറുപടി പറയുന്നതിലെ അനൗചിത്യമോർത്ത്.

പാവം സംഘപരിവാർ.പോപുലർ ഫ്രണ്ടുകാരെപ്പോലെ ഒന്നും ചെയ്യാത്ത പാവങ്ങൾ.മാത്രുഭൂമി ഓഫീസിലേക്ക് മാർച്ച് നടത്തിയവർ അഭിപ്രായസ്വാതന്ത്ര്യത്തിനു വേണ്ടിയായിരിക്കും.എന്നെ ആരോ തറ്റിദ്ധരിപ്പിച്ചതാകും.ഇനിമുതൽ പോപുലർ ഫ്രണ്ട് പറയുന്നതും സംഘ പരിവാരം പറയുന്നതും മാത്രം ഞാൻ വിശ്വസിക്കാം .മാപ്പ്.മറ്റൊരു സംവാദത്തിൽ ആകാം ബാക്കി.ബൈ

7-മതങ്ങൾ പരസ്പരം അക്രമം തുടരണമെന്ന് കൊതിക്കുന്ന ഒരു മനസ്സ് ആർക്കും ഉണ്ടായിക്കൂടാ.മതവിരുദ്ധതയും ഒരു തരം സാഡിസമാകരുത്.കിർഗ്ഗിസ്ഥാനിൽ ഒരേ മതക്കാർ തമ്മിൽ തങ്ങളുടെ മതത്തിലില്ലാത്ത വംശീയതയുടെ പേരിൽ പരസ്പരം കൊല്ലുന്നു.അതിൽ ഖുറാനെന്ത് റോൾ?

ഒന്നും രണ്ടും ലോകയുദ്ധങ്ങൾ മതത്തിന്റെ പേരിലായിരുന്നോ?

മാവോയിസ്റ്റുകൾ നിരപരാധികളെ കൊല്ലുന്നത് മതപ്രചോദിതമായാണോ? തമിഴ് പുലികൾ ചാവേറുകളായത് മതംകാരണമോ? അപ്പോൾ ഹിംസക്കു കാരണം മതം മാത്രമാണെന്ന് വിധിയെഴുതരുത്.അക്രമത്തെ സ്ഥാപനവൽക്കരിക്കുന്ന ഒരു സാമൂഹ്യസാഹചര്യം/അന്തരീക്ഷം നിലനിർത്താൻ സ്ഥാപിത താൽപര്യക്കാർ നിരന്തരം ശ്രമിക്കുന്നു.

കാലം കൊണ്ട് സമൂഹമനസ്സിൽ ഉറച്ചുപോയ മതവിശ്വാസം തുടച്ചു നീക്കിയിട്ട് അക്രമം ഇല്ലാതായാൽ മതി എന്ന് കരുതുന്നവരുടെ മനസ് ഹിംസയോട് നിസംഗത പിലർത്തുന്നതാണ്.അതുവരെ മനുഷ്യർ കൊന്ന് തീരട്ടേ എന്നാണോ പലരും കരുതുന്നത് എന്ന് തോന്നിപ്പോകുന്നു പ്രതികരണങ്ങൾ വായിക്കുമ്പോൾ.

ഹിംസയെ മനസിൽ താലോലിക്കുന്നവർ തന്നെയാണോ മതത്തെ എതിർക്കുന്നവരും.

മതത്തിലെന്നല്ല മനുഷ്യന്റെ പ്രകൃതത്തിൽ തന്നെ ഹിംസ പതിഞ്ഞിരിപ്പുണ്ട്.മതവും രാഷ്ട്രീയവും മറ്റും അതിനെ തരാതരം പോലെ ഉപയോഗിക്കുന്നു.മതങ്ങൾക്കകത്ത് അതുൽഭവിച്ചകാലത്തെ സാഹചര്യങ്ങളുമായി ബന്ധപ്പെട്ട് ഹിംസക്ക് സ്ഥാനം കിട്ടിയിട്ടുണ്ട്.ആധുനിക മതേതര രാഷ്ട്രീയപ്രസ്ഥാനങ്ങൾ പോലും അതിന്റെ തത്വത്തിൽ ഹിംസയെ സ്ഥാപിച്ചിട്ടുണ്ട്.ഉദാ:മാർക്സിസം.

ഒരു വർഗ്ഗീയ കലാപത്തിൽ നൂറു കണക്കിന്,ആയിരക്കണക്കിന് ആളുകൾ മരിക്കുന്നു.എന്നാൽ നൂറോ അതിൽ താഴെയോ ആളുകൾ മരിക്കുന്ന ബോംബു സ്ഫോടനങ്ങളോടാണ് നമുക്ക് ഭീതി.വൈകാരികമായി നാം പ്രതികരിക്കുന്നതും അതിനോടാണ്.അത് ഹിന്ദു ബോംബായാലും മുസ്ലിം ബോംബായാലും.ഭരണകൂടങ്ങളുടെ അനാസ്ഥ മൂലം,പട്ടിണിമൂലം,കാർഷിക-തൊഴിൽ തകർച്ചമൂലം,രാജ്യങ്ങൾ തമ്മിൽ ഭാഷകൾ തമ്മിൽ വർന്ന-വംശങ്ങൾ തമ്മിൽ കലഹം മൂലം,പോലീസ് അതിക്രമങ്ങൾ മൂലം അങ്ങനെ എത്രപേർ മരിക്കുന്നു.എല്ലാത്തിന്റെ പിന്നിലും കാരണം ഹിംസയാണ്.

എല്ലാ ഹിംസകളും അത് ചെറുതായാലും വലുതായാലും ഒന്നു തന്നെ.എന്നാൽ ചിലത് കാണുകയും ചിലത് കാണാതെ പോകുകയും ചെയ്യുന്നത് നമ്മുടെ മുൻ വിധികൾ കാരണമാണ്.

സ്ഥാപനവൽക്കരിക്കപ്പെടുന്ന ഹിംസയുടെ ഒരു ഭാഗം മാത്രമാണ് മതഭ്രാന്ത്.

ഹിംസയുടെ എല്ലാ കാരണങ്ങളെയും കണ്ടെത്തി അത് തുറന്നു കാണിക്കണം .അതല്ലേ സത്യസന്ധത?

8-ഉദ്ധരണികളുടെ പിറകെ പോയി മതങ്ങളെ അപഹസിച്ച്/വിമർശ്ശിച്ച് സമാധാനപരമായ ലോകത്തിലേക്ക്/സമൂഹത്തിലേക്കുള്ള പാത പണിയാം എന്ന വ്യാമോഹം ഈയുള്ളവനില്ല.ഓരോരുത്തർക്കും ഓരോ മാർഗ്ഗമുണ്ട്.ഒരു മാർഗ്ഗമേ ശരിയുള്ളു എന്ന് ധരിക്കുന്നത് സങ്കുചിതത്വമാണ്.ഒന്നിച്ചു നീങ്ങാവുന്ന പലമാർഗ്ഗങ്ങളുണ്ട്.മതേതരത്വം,ബഹുസ്വരത എന്നൊക്കെ പറയുന്നത് ഏതെങ്കിലും ഒന്നിനെ/പലതിനെ തച്ചുടച്ചില്ലാതാക്കിയ ശേഷം ഉണ്ടാക്കുന്ന ഏകശിലാത്മകത്വമല്ല.പുതിയ കാലഘട്ടത്തിനനുസൃതമായി സ്വയം മാറാനും സ്വത്വത്തെ പുതിയ കാലഘട്ടത്തിനനുസരിച്ച് പുനർ നിർമ്മിച്ച് വൈവിധ്യങ്ങളെ ആഘോഷിക്കാനുമുള്ള സന്നദ്ധതയാണത്.

സഹോദരങ്ങളെ കൊല്ലാൻ അറച്ചുനിന്ന അർജ്ജുനന് ആത്മ ധൈര്യം പകരാൻ ശ്രീകൃഷ്ണൻ നൽകിയ ഉപദേശമാണ് ഭഗവത് ഗീത എന്ന് ലളിതവൽക്കരിച്ച് അത് ഹിംസക്ക് ആഹ്വാനം ചെയ്യുന്നു എന്ന് പറയാറുണ്ട്.എന്നാൽ ഇതേ ഭഗവത്ഗീതയാണ് മഹാത്മാഗാന്ധി തന്റെ അഹിംസാ മാർഗ്ഗത്തിന് അവലംബമാക്കിയത്.

ഇന്നുള്ള ഇസ്ലാമികഭീകരതൊക്കെ കാരണം ഖുർ-ആനും ഹദീസുകളുമാണെങ്കിൽ സിംഹളരുടെ അക്രാമകദേശീയതക്ക് കാരണം ബുദ്ധമതമാണോ?അഹിംസയിലധിഷ്ഠിതമായ ബുദ്ധ,ജൈനമതങ്ങളിൽ വിശ്വസിക്കുന്ന രാജാക്കന്മാരും പ്രസ്ഥാനങ്ങളും സംഘടനകളും നടത്തിയ/നടത്തുന്ന ക്രൂരതകൾക്ക് കാരണം ബുദ്ധന്റെയോ മഹാവീരന്റെയോ ഉപദേശങ്ങളോ പ്രവൃത്തികളോ അല്ലല്ലോ.ഗുരുനാനാക്ക് തന്റെ പുതിയ മതത്തിന് പ്രചോദനം ഉൾക്കൊണ്ടത് ഇസ്ലാമിക സൂഫിസത്തിൽ നിന്നായിരുന്നു.ഗുരുനാനാക്കിന്റെ മതത്തിൽ പിന്നീട് ഹിംസാത്മകരീതി കടന്നുകൂടിയത് അദ്ദേഹത്തിന്റെ വാക്കും പ്രവൃത്തിയും കാരണമല്ലല്ലോ?

അപ്പോൾ ഗീതയുടെയും ഖുർ-ആന്റെയും വിശാലമായ മാനുഷികതയുടെ അന്തസ്സാരം ചരിത്രകാരണങ്ങളാൽ സംഭവിച്ച ഹിംസയെ നിഷേധിക്കുന്നു എന്നതാണ് സൂഫിസവും ഗാന്ധിസവുമെല്ലാം സാധ്യമായതിലൂടെ വെളിവാകുന്നത്.

ശാസ്ത്രം അറിവാണല്ലോ.ശാസ്ത്രത്തെ അഹിംസക്കും ഹിംസക്കും ഉപയോഗിക്കുന്നത് മനുഷ്യരിലെ വ്യത്യസ്ത താൽപര്യങ്ങളാണ്.അധികാരം,ലാഭേച്ഛ അങ്ങനെയുള്ള ഭൗതിക താൽപര്യങ്ങളാണ് മതത്തിലും ശാസ്ത്രത്തിലും ഹിംസ കലർത്തുന്നത്.ബോംബുണ്ടാക്കാൻ അറിവു തന്ന ശാസ്ത്രമാണ് കുഴപ്പക്കാരൻ.അതു കൊണ്ട് ശാസ്ത്രം ഇല്ലാതാകണമെന്ന് ശഠിക്കുന്നത് പോലെ വ്യർത്ഥമാണ് മതങ്ങൾ ഇല്ലാതായാൽ സമാധാനം കൈവരും എന്ന വ്യാമോഹം.

ഇന്ന് നാമീ ഉപയോഗിക്കുന്ന ഇന്റർ നെറ്റ് പോലും യുദ്ധ,സൈനിക ആവശ്യങ്ങളുമായി ബന്ധപ്പെട്ട് ഉൽഭവിച്ചതാണ്.അത് കൊണ്ട് യുദ്ധ,സൈനികാക്രമണങ്ങളും അതിനു വേണ്ടിയുള്ള ഗവേഷണങ്ങളും ഉണ്ടായാലേ ശാസ്ത്രസാങ്കേതികത വികസിക്കൂ എന്ന് പറയുന്ന ഒരു ശാസ്ത്രഭീകരവാദി നാളെ രംഗത്തുവന്നാൽ അതെത്രമാത്രം ബാലിശമാണോ അതുപോലെ ഇസ്ലാമിക ഭീകരവാദവും ബാലിശവും മതവിരുദ്ധവുമാണ്.

മതത്തിന്റെ ജീനിൽ ഹിംസയുണ്ടെന്നാണെങ്കിൽ ശാസ്ത്രത്തിന്റെ ജീനിലും അതുണ്ട്.രണ്ടിലും അഹിംസയുമുണ്ട്.അത് കൊണ്ട് നാം ഏതിനെ ഊതിപ്പെരുപ്പിച്ച് കാണിക്കണം.അതാണ് മൗലിക ചോദ്യം.

സാമ്രാജ്യവാദികളും യുദ്ധക്കൊതിയന്മാരും ആയുധക്കമ്പനികളും ഹിംസയെ പ്രോത്സാഹിപ്പിക്കും.പരസ്പരം ചേരിതിരിഞ്ഞ് യുദ്ധത്തിനു വേണ്ടി വാദിക്കും.

അപ്പോൾ ഹിംസയുടെ വാദങ്ങൾക്ക് കരുത്ത് പകരുന്ന രീതിയിൽ ചരിത്രത്തെയും വിജ്ഞാനങ്ങളെയും അവതരിപ്പിക്കുന്നതും ഉറപ്പിക്കുന്നതും നല്ലതല്ല.വിരുദ്ധപാഠങ്ങളെ പാടെ തള്ളിക്കളയുന്നത് അപകടകരമാണ്.


കെ ഇ എൻ/ഹമീദ്:കപടന്മാരുടെ കടിപിടി, ഭാഗം-1

/കെ ഇ എൻ കടിപിടി-2-ാം ഭാഗം